Under this page, you will find updated information regarding the court. News updates, press releases and announcements of the courts will be displayed under this page.

Additionally, speeches of the President and Vice President of the courts, and services for the media such as media advisories are included in this page.

የፌዴራል መጀመሪያ ደረጃ ፍርድ ቤት በ2012 በጀት ዓመት መልካም አፈጻጸም ላስመዘገቡ ዳኞች እና ምድብ ችሎቶች እውቅና ሰጠ፡፡
/ Categories: News

የፌዴራል መጀመሪያ ደረጃ ፍርድ ቤት በ2012 በጀት ዓመት መልካም አፈጻጸም ላስመዘገቡ ዳኞች እና ምድብ ችሎቶች እውቅና ሰጠ፡፡

ፍርድ ቤቱ ከእያንዳንዱ ምድብ ችሎቶት በባህሪና በመዝገብ አፈጻጸም መልካም ውጤት ያስመዘገበ 1 ዳኛ በመምረጥ በአጠቃላይ ለ11 ዳኞች የእውቅና ምስክር ወረቀት ሰጥቷል፡፡ በተጨማሪም በአንጻራዊ ምዘና አራዳ፣ ድሬደዋ እና ቂርቆስ ምድብ ችሎት የተሻለ አገልግሎት በመስጠት ላይ የሚገኙ ምድብ ችሎቶች ሆነው ሽልማት ተሰጥቷቸዋል፡፡

በሌላ በኩል ከመደበኛ የዳኝነት ስራቸው በተጨማሪ አስተዳደራዊ ስራዎችን በማገዝ ጉልህ አስተዋጽኦ ላደረጉ በተመሳሳይ እውቅና የሰጠ ሲሆን የግዢና ንብረት አስተዳደር፣ የፋይናንስ እና የሰው ሃብት ልማት አስተዳደር ዳይሬክቶሬት በአስተዳደር ዘርፍ በመልካም አፈጻጸማቸው ምስጋና የተቸራቸው ናቸው፡፡

በእውቅና መርሃ ግበሩ መልእክት ያስተላፉት የፌዴራል መጀመሪያ ደረጃ ፍርድ ቤት ፕሬዝደንት ክቡር አቶ ፉአድ ኪያር የህግ የበላይነትን በማረጋገጥ ከፍተኛ ድርሻ ያለው የዳኝነት አካል ነጻነቱንና ገለልተኛነቱን ጠብቆ ህግ የመተርጎም ህገመንግስታዊ ተልዕኮውን እንዲወጣ ጥረት ተደርጓል ብለዋል፡፡ በዚህም በጀትን ለህዝብ ተወካዮች ምክር ቤት በማቅረብ እንዲጸድቅ ተደርጓል፡፡ የዳኞች ደመወዝ መሻሻልና የጋራ መኖሪያ ቤት እንዲጠናቀቅ መደረጉም ዳኞች በነጻነት እንዲሰሩ ምቹ ሁኔታን መፍጠር መቻሉን ጠቁመዋል፡፡

ቀልጣፋና የህዝብ አመኔታን ያተረፈ ዳኝነት መስጠት የሚያስችሉ ተግባራት በፍርድ ቤቱ አመራር የተከናወኑ ቢሆንም በራሳቸው ውጤት አይደሉም ያሉት ክቡር አቶ ፉአድ ኪያር ዳኞች የሚቀርቡላቸውን ጉዳዮች ምክንያታዊ በሆነ ጊዜ ህጋዊና ፍትሃዊ ውሳኔ በመስጠት የህዝብ አመኔታ የተቸረው ፍርድ ቤት እውን አንዲሆን የማድረግ ሃላፊነት የተጣለባቸው መሆኑን አሳስበዋል፡፡

የፌዴራል ጠቅላይ ፍ/ቤት ምክትል ፕሬዝደንት ክቡር አቶ ሰለሞን አረዳ በበኩላቸው የላቀ አፈጻጸም ላስመዘገቡ እና እውቅና ለተሰጣቸው ዳኞች የእንኳን ደስ አላችሁ መልእክታቸውን ያስተላለፉ ሲሆን የመጀመሪያ ደረጃ ፍርድ ቤት አመራሮች ለውጥ ለማምጣት እያካሄዱት ያሉት ትግል ከፍተኛ መሆኑን ያመለከቱ ሲሆን ዳኞች በፍትሃዊ ችሎት በፍሬ ነገር፣ በህግና በማስረጃ ላይ መሰረት ያደረገ ዳኝነት በመስጠት አመራሮቹን እንዲያግዟቸው ጠይቀዋል፡፡

በመርሃ ግብሩ ዳኞች በሰዎች ሀብት፣ ነጻነትና ህይወት ላይ በሚሰጡት ፍርድ ፍትህን የማስፈን ስኬታማነታቸውን ከፍ ለማድረግ የሚያስችል “እኔ ድንቅ ነኝ” በሚል ርዕስ አነቃቂ ገለጻ በዳዊት ድሪምስ የቀረበ ሲሆን ዳኞች እንደ ሰው በተፈጥሮ ያገኙትን ድንቅ ማንነት በመጠቀም እና በይቻላል እምነት በመነሳት ራሳቸውን፣ ቤተሰባቸውን፣ ፍርድ ቤታቸውን እና ሃገራቸውን የሚለውጥ ስራ እንዲሰሩ ሃሳብ እንዲጸንሱና እምነት እንዲይዙ ማነሳሳት ተችሏል፡፡

በመጨረሻም የፌዴራሉ የመጀመሪያ ደረጃ ፍርድ ቤት በ2013 ዓ.ም ከ150 ሺህ መዛግብት በላይ ለውሳኔ እንደሚቀርቡለት በዕቅድ የተያዘ ሲሆን ከእነዚህም ውስጥ 125 ሺህ በላይ ለሚሆኑ መዛግብት እልባት ለመስጠት ዕቅድ መያዙ ይፋ ተደርጓል፡፡

የፌ/ጠ/ፍ/ቤት ኮሚዩኒኬሽን ጉዳዮች ዳይሬክቶሬት

Previous Article ለፌዴራል መጀመሪያ ደረጃ ፍርድ ቤት ኮሮና ቫይረስ ለመከላከል የሚያስችል ድጋፍ ተደረገለት
Print
253